દ્રાક્ષની નિકાસમાં એપ્રિલ સુધી સતત તેજી રહેશે

યુરોપ, રશિયા, બાંગ્લાદેશ અને મધ્ય-પૂર્વના દેશોમાં દ્રાક્ષની માંગ મજબૂત રહેતા ખેડૂતોને સારા ભાવ મળવાની આશા

ગુજરાતમાં ખાસ કરીને દક્ષિણ ગુજરાત અને કચ્છમાં દ્રાક્ષની ખેતી કરવામાં આવે છે. મોટાભાગના ખેડૂતો દ્રાક્ષની ખેતીમાં સારી એવી આવક મેળવી રહ્યા છે. ભારતના વિવિધ રાજ્યોમાં પણ દ્રાક્ષની મોટાપાયે ખેતી કરવામાં આવે છે અને ભારતીય દ્રાક્ષે હવે યુરોપિયન માર્કેટમાં પણ પગદંડો જમાવ્યો છે. વિદેશોમાં ખાસ કરીને સારી ગુણવત્તાવાળી દ્રાક્ષની નિકાસમાં તેજી આવી છે. એક તરફ જંતુનાશક અવશેષોને પગલે યુરોપીયન યુનિયન તરફથી ભારતીય દ્રાક્ષને નામંજૂર કર્યાના ચાર વર્ષ પછી ફરી એકવાર દ્રાક્ષની ખરીદી કરવા માટે લાઈનો લગાવી છે અને યુરોપીયન યુનિયનો હવે ભારતીય દ્રાક્ષની ક્વોલિટી પર પોતાનો ભરોસો વ્યક્ત કરી રહ્યા છે. પહેલા યુરોપિયન યુનિયને ભારતીય દ્રાક્ષની નિકાસ પર રોક લગાવતા ખાસી એવી અસર પડી હતી. જો કે આ તરફ મહારાષ્ટ્રમાં માવઠાને કારણે  દ્રાક્ષનું ઉત્પાદન કરતા વિસ્તારમાં પાકને નુકસાન થયું હોવા છતાં વર્ષ ૨૦૧૩-૧૪માં ભારતમાંથી દ્રાક્ષની રેકોર્ડબ્રેક નિકાસ થવાનું નક્કી છે. વળી યુરોપ, રશિયા, બાંગ્લાદેશ અને મધ્ય-પૂર્વના દેશોમાં દ્રાક્ષની માંગ મજબૂત રહેતા ખેડૂતોને સારા ભાવ પણ મળવાની આશા છે. ૩ માર્ચ સુધી યુરોપ અને યુકે.માં ૧૪,૦૦૦ ટન દ્રાક્ષની નિકાસ થઈ છે. જે પાછલા વર્ષે આજ સમયગાળામાં ૮,૫૦૦ ટન દ્રાક્ષની નિકાસ કરવામાં આવી હતી. યુરોપ અને યુકે.ના ગ્રાહકોને હવે ભારતીય દ્રાક્ષની ગુણવત્તા પર ભરોસો વધ્યો છે. તો રશિયા અને ચીન જેવા દેશોએ વૈકલ્પિક બજાર ખોલતા દ્રાક્ષની એકંદરે નિકાસમાં વધારો થયો છે. દ્રાક્ષના ખેડૂતોને હાલમાં નિકાસ ક્વોલિટીની દ્રાક્ષ માટે રૃપિયા ૬૫થી ૯૦ પ્રતિ કિલો સુધીના ભાવ મળી રહ્યા છે. વેપારીઓના મતે લંબાઈવાળી દ્રાક્ષની બાંગ્લાદેશ અને મિડલ ઈસ્ટમાં ખાસ્સી એવી માગ છે જ્યારે યુરોપિયન ગ્રાહકો મોટી સાઈઝની દ્રાક્ષ પસંદ કરી રહ્યા  છે. તો  આફ્રિકા અને ચીલી જેવા દેશોમાંથી  સપ્લાય ઓછો થતાં યુરોપિયન ગ્રાહકો ભારતીય દ્રાક્ષની ખરીદી કરી રહ્યા છે. ઉલ્લેખનીય છે કે, ગત વર્ષે દ્રાક્ષની નિકાસ કરતી કંપનીઓએ ૪૦થી ૫૦ ટકાનો નિકાસ ગ્રોથ હાંસલ કર્યો હતો. ત્યારે આ વર્ષે અલગ અલગ વેરાયટીને કારણે ભારતીય દ્રાક્ષની નિકાસમાં એપ્રિલ માસ સુધી સતત તેજી જોવાઈ શકે છે.
published in Gujarat leading agriculture news paper Agro sandesh..