રવી પાક ખેડૂતોને કમાણી કરાવશે

ટેકાના ભાવમાં રૃ.૧૨૦ સુધીનો વધારો થશે

ઘઉંનો ટેકાનો ભાવ પ્રતિક્વિન્ટલ રૃપિયા ૧,૪૦૦, રાઇનો રૃપિયા ૩,૦૫૦ અને ચણાનો ટેકાનો ભાવ રૃપિયા ૩,૧૦૦ રહેવાનો અંદાજઃ કૃષિ મંત્રાલય દ્વારા પ્રતિક્વિન્ટલ રૃપિયા ૧૦૦થી ૨૦૦નો વધારો કરવાની કેબિનેટ કમિટીને ભલામણ કરાઈ

ખરીફ સીઝનના પાકનું ઉત્પાદન બજારમાં આવવાનું શરૃ થતાં ખેડૂતો હવે રવી સીઝનની તૈયારીઓ આરંભશે. વાવેતર કરતાં પાક ઉત્પાદનના ભાવ ખેડૂતો માટે ઘણાં અગત્યના છે. બજારભાવ જ ખેડૂતોના પરસેવાની કમાણી નક્કી કરતા હોવાની સાથે ભાવ સારા હોય તો ઓછા ઉત્પાદનની વચ્ચે પણ ખેડૂતોને સારી કમાણી થાય છે. ખેડૂતોે નુક્સાનીની ગર્તામાં ન ધકેલાય તે માટે દર વર્ષે પાકવાર ટેકાના ભાવો જાહેર થાય છે. ચાલુ વર્ષે પણ સીએસીપી ( કમીશન ફોર એગ્રીકલ્ચર કોસ્ટ એન્ડ પ્રાઇસ) અને કૃષિ મંત્રાલય દ્વારા ટેકાના ભાવની ભલામણ કેબિનેટ કમિટી સમક્ષ રજૂ કરવામાં આવી છે. જેમાં મંત્રાલય દ્વારા ટેકાના ભાવમાં ક્વિન્ટલે રૃપિયા ૧૦૦થી ૨૦૦નો તો સીએસીપીએ રૃપિયા ૫૦થી ૧૨૦નો વધારો કરવાની ભલામણો મૂકી છે. આ ભલામણો સ્વીકારવામાં આવશે તો ઘઉંનો ટેકાનો ભાવ પ્રતિક્વિન્ટલ રૃપિયા ૧,૪૦૦, રાઈનો રૃપિયા ૩,૦૫૦ અને ચણાનો ટેકાનો ભાવ રૃપિયા ૩,૧૦૦ રહે તેવો અંદાજ લગાવાઇ રહ્યો છે.     

કૃષિ વિભાગ દ્વારા કઠોળ અને તેલીબિયાં પાકોનું વાવેતર વધે તેવા પ્રયાસોના ભાગરૃપે આ પાકોની એમએસપીમાં વધારો કરવામાં આવી રહ્યો છે. ખરીફ સીઝનમાં કઠોળ અને તેલીબિયાં પાકોની એમએસપીમાં વધારાની અસર વાવેતરમાં જોવા મળી હતી. રવી સીઝનમાં પણ કૃષિ વિભાગે ઘઉં, રાયડો, ચણા અને મસૂરના ભાવોની એમએસપીમાં રૃપિયા ૧૦૦થી ૨૦૦નો વધારો કરવા કેબિનેટ કમિટીને ભલામણ કરવામાં આવી છે. જો મંત્રાલયની ભલામણને સ્વીકારવામાં આવશે તો ખેડૂતોને બખ્ખાં થઇ જશે, પરંતુ હંમેશાં સીએસીપીની ભલામણોને કેબિનેટ કમિટી માન્ય ગણતી હોવાથી સીએસીપીએ રવી સીઝન માટે પાક દીઠ રૃપિયા ૫૦થી લઇને ૧૨૦ રૃપિયાનો વધારો કરવાની ભલામણ કરી છે. જે હાલમાં માન્ય ગણાશે તેવો અંદાજ બંધાઇ રહ્યો છે.

કઠોળ પાકોમાં રવી સીઝનના મુખ્ય પાક ચણા માટે સીએસીપીએ ૨૦૧૩-૧૪ કરતાં રૃપિયા ૧૦૦ વધારવાની તો કૃષિ મંત્રાલયે રૃપિયા ૨૦૦ એમએસપી વધારી ભાવ પ્રતિ ક્વિન્ટલ રૃપિયા ૩૨૦૦ કરવાની માંગણી કરી છે. આ જ પ્રકારે મસૂરમાં સીએસીપીએ પ્રતિ ક્વિન્ટલ રૃપિયા ૫૦ વધારવાની માંગણી સામે કૃષિ મંત્રાલયે ૨૦૦ રૃપિયા વધારી ભાવ રૃપિયા પ્રતિ ક્વિન્ટલ ૩૧૦૦ નક્કી કરવાની ભલામણ કરી છે. રાયડાની એમએસપીમાં પણ સીએસીપીએ રૃપિયા ૫૦નો વધારો કરવાની તો કૃષિ મંત્રાલયે પ્રતિ ક્વિન્ટલ રૃપિયા ૧૫૦ વધારી ૩૧૫૦ કરવાનો અંદાજ લગાવ્યો છે. સીએસીપીએ ઘઉંની એમએસપીમાં રૃપિયા ૫૦ વધારવાની ભલામણ કરી છે. જ્યારે મંત્રાલય રૃપિયા ૧૦૦ વધારી ભાવ પ્રતિ ક્વિન્ટલ રૃપિયા ૧૪૫૦ થાય તેવી માંગ કરી રહ્યું છે. આમ એમએસપીના વધારો અને ઘટાડો વાવેતરના આંકને અસર કરતો હોવાથી કૃષિ વિભાગ ખેડૂતોને ટેકાના ભાવ વધુ મળે તેવા પ્રયાસો કરી રહ્યું છે. ગત સપ્તાહે રવી સીઝન પર નેશનલ કોન્ફરન્સ યોજાઇ ગઇ. જેમાં રવી સીઝનમાં પાકનું ઉત્પાદન વધારવાનો જ મુખ્ય સૂર હતો. આ માટે રાષ્ટ્રવ્યાપી નીતિ ઘડવા પર ભાર મુકાયો હતો. આમ કૃષિ વિભાગ રવી સીઝનમાં ઉત્પાદન વધારવાના પ્રયાસો કરી રહ્યું છે. રવી સીઝનમાં ધાન્ય પાકોનો મુખ્ય આધાર ગણાતા ઘઉં અને કઠોળ પાકોમાં ચણાનું સૌથી વધુ વાવેતર થાય છે તો તેલીબિયાં પાકોના ઉત્પાદનનો ગ્રાફ ઊંચો લઇ જવામાં રાઇના પાકનું પણ ઘણું ઊંચું મહત્ત્વ છે. એક દાયકા પૂર્વે નજર કરીએ તો ૨૦૦૩-૦૪માં ઘઉંનો ટેકાનો ભાવ રૃપિયા ૬૨૦ હતો જ્યારે ૨૦૧૨-૧૩માં ૧૩૫૦ અને ૨૦૧૩-૧૪માં ૧૪૦૦ થાય તેવી શક્યતા છે. આમ દાયકામાં  ઘઉંનો ટેકાનો ભાવ ડબલ થયો છે. આ જ પ્રકારે ચણાનો ભાવ રૃપિયા ૧૨૨૦ હતો જે હાલમાં ૩૧૦૦ રૃપિયા થયો છે. આમ ખેતી ખર્ચ વધતાં સામે ટેકાના ભાવમાં પણ ઉત્તરોત્તર વધારો થયો છે. રાયડામાં પણ દસકા પૂર્વે ટેકાનો ૧૩૩૦નો ભાવ હાલમાં ૩૦૫૦ રૃપિયાએ પહોંચ્યો છે. આમ ટેકાના ભાવથી ખેડૂતોને ફાયદો થતો રહ્યો છે. રાજ્યમાંથી રવી સીઝનમાં ઘઉંની ટેકાના ભાવે મોટી ખરીદી થાય છે.

                                                              

ટેકાના ભાવમાં વધારો કરવા કરાયેલી ભલામણો

પાક       સીએસીપી           કૃષિ મંત્રાલય         નવો અંદાજ

ચણા      ૧૦૦                     ૨૦૦                  ૩૧૦૦

મસૂર      ૫૦                         ૨૦૦                 ૩૦૫૦

રાઇ       ૫૦                         ૧૫૦                 ૩૦૫૦

ઘઉં        ૫૦                        ૧૦૦                  ૧૪૦૦

જવ       ૧૨૦                       ૧૨૦                  ૧૧૦૦

સૂરજમુખ  ૨૦૦                    ૨૦૦                      ૩૦૦૦

નોંધઃ ભાવ પ્રતિક્વિન્ટલ રૃપિયામાં અને ટેકાના નવા ભાવનો અંદાજ સીએસીપીએ કરેલી ભલામણોને આધારે છે.

રવી પાકોના વર્ષવાર લઘુતમ ટેકાના ભાવ (રૃપિયામાં)

પાક       ૨૦૦૬-૦૭  ૨૦૦૭-૦૮  ૨૦૦૮-૦૯  ૨૦૦૯-૧૦  ૨૦૧૦-૧૧    ૨૦૧૧-૧૨  ૨૦૧૨-૧૩     ૨૦૧૩-૧૪

જવ         ૫૫૦              ૫૬૫             ૬૫૦     ૬૮૦                  ૭૫૦     ૭૮૦               ૯૮૦          ૯૮૦

ગ્રામ         ૧૪૩૫          ૧૪૪૫            ૧૬૦૦   ૧૭૩૦            ૧૭૬૦    ૨૧૦૦              ૨૮૦૦     ૩૦૦૦

મસૂર        ૧૫૩૫            ૧૫૪૫           ૧૭૦૦   ૧૮૭૦             ૧૮૭૦   ૨૨૫૦              ૨૮૦૦   ૨૯૦૦

રાયડો       ૧૭૧૫          ૧૭૧૫             ૧૮૦૦    ૧૮૩૦            ૧૮૩૦   ૧૮૫૦             ૨૫૦૦     ૩૦૦૦

સૂરજમુખી ૧૫૬૫           ૧૫૬૫            ૧૬૫૦   ૧૬૫૦              ૧૬૮૦   ૧૮૦૦            ૨૫૦૦   ૨૮૦૦
published in Gujarat leading agriculture news paper Agro sandesh..