અમેરિકન પ્રાઈડ બેંકના ચેરમેનની ગુજરાતમાં ખેતી

-  અમેરિકાથી  ડિસેમ્બર, માર્ચ- એપ્રિલ, જુલાઈ- ઓગસ્ટ મહિનામાં ગુજરાતની મુલાકાત લેતા સમયે આફવાના ખેડૂત ખેતીમાં અચૂક રસ દાખવી પરામર્શ કરે છે.

- ૧૪૦ વીઘામાં મેનેજમેન્ટથી થતી ખેતી : અમેરિકામાં વિવિધ હોદ્દા અને મોટલોના વ્યવસાયમાં પણ આગવી નામના મેળવી : વેપાર અને ખેતી બન્નેમાં યોગ્ય મેનેજમેન્ટથી બંનેેમાં મહત્ત્વપૂર્ણ સિદ્ધિ હાંસલ કરી : દેશ અને દુનિયામાં નામના મેળવ્યા બાદ પણ ખેડૂત હોવાનો ગર્વ

-  બારડોલીના દિલીપભાઇ પટેલ અમેરિકામાં ડેની પટેલ બની કરોડોનું સામ્રાજ્ય ફેલાવ્યા છતાં ખેતીનો વારસો આજે પણ જાળવી રાખ્યો : ખેતીની તમામ માહિતી ફાર્મના મેનેજર પાસેથી મેળવવાની સાથે ફાર્મ પર કુલ ૧૫થી ૨૦ માણસોને પગારથી રાખ્યા 

- ૧૪૦ વીઘામાંથી ૩૦ વીઘામાં શેરડી , ૧૫ વીઘા ડાંગરની ખેતી અને બાકીની જમીનમાં ૬થી ૭ હજાર આંબાના ઝાડ 

કરોડોની સંપતિ, અમેરિકામાં હોટલ અને મોટેલ એસો.ના ચેરમેન સહિત મોટાપાયે કન્સ્ટ્રક્શન વ્યવસાય છતાં બારડોલીના આફવાના દિલીપભાઇ પટેલનો ખેતી સાથે નાતો છૂટતો નથી. આજે પણ અમેરિકાથી આફવા આવે ત્યારે ખેતીમાં રસ દાખવે છે. ફાર્મ પર મેનેજરો રાખ્યા છે. કુંટુંબીજનો જમીન સંભાળતા હોવા છતાં પણ દિલીપભાઇ  ૧૪૦ વીઘા જમીનમાં ખાસ રસ દાખવી રહ્યા છે. માણસ ગમે તેટલી ઉંચાઈએ પહોંચી જાય પરંતુ તે ખેડૂત હોય તેનો અહેસાસ તેને હંમેશા થતો હોય છે. ખેતી અને ખેતર સાથે જોડાયેલો વ્યક્તિ દુનિયાના કોઈપણ છેડે પહોંચી જાય પરંતુ તેને પોતાનું વતન અને ખેતર હંમેશા આંખ સામે જ રમતું હોય છે. સુરત જિલ્લાના બારડોલી તાલુકાના આફવા ગામના રહેવાસી એવા ૪૯ વર્ષીય દિલીપકુમાર રમણભાઈ પટેલ આમ તો એનઆરઆઈ ખેડૂત છે. તેઓની પાસે આફવા ગામમાં ૧૪૦ વીઘા જમીન છે. જેની અંદર શેરડી, આંબા અને ડાંગરની ખેતી કરે છે. વર્ષ ૧૯૮૫-૮૬માં અમેરિકા સ્થાયી થયેલા દિલિપભાઈ દર વર્ષે ડિસેમ્બર, માર્ચ, એપ્રિલ અને જુલાઈ તેમજ ઓગસ્ટ મહિનામાં ગુજરાત સ્થિત પોતાના આફવા ગામની મુલાકાત લે છે ત્યારે ખેતીમાં રસ દાખવાનું અચૂક ભૂલતા નથી. અમેરિકા સ્થિત તેમના પરિવારમાં પુત્ર, પત્ની, પિતા, બહેન અને બનેવી સહિતના તમામ પરિવારના લોકો રહે છે. જો કે ખેતીની દેખરેખ માટે દિલીપભાઈ અને તેમના પુત્ર પણ ઘણીવાર વતનની મુલાકાત લે છે. દિલીપભાઈ ખેડૂતની સાથે સાથે અમેરિકાની 'અમેરિકન પ્રાઈડ બેંક'ના ચેરમેન છે. આ સિવાય મોટલના વ્યવસાય પણ કરે છે. સાથેજ અમેરિકામાં પોતાનો કંસ્ટ્રક્શનનો પણ વ્યવસાય છે એટલે ખેતી અને વેપાર બન્નેમાં હંમેશા રચ્યા પચ્યા રહે છે. જો કે ખેતી અને વ્યવસાય બન્ને મેનેજમેન્ટથી કરી રહ્યાં છે.

અમેરિકાથી વર્ષમાં ચારથી પાંચ વખત આફવાની મુલાકાત લે ત્યારે તેઓ આ સમગ્ર ખેતીનું મેનેજમેન્ટ કરે છે. ૧૪૦ વીઘામાંથી ૩૦ વીઘામાં શેરડી છે. ૧૫ વીઘા ડાંગરની ખેતી છે આ સિવાય અન્ય જમીનમાં આંબાની કલમો છે તે અંગે ફાર્મના મેનેજર પાસેથી માહિતી મેળવે છે. આ સિવાય ફાર્મ પર કુલ ૧૫થી ૨૦ માણસોને પગારથી રાખવામાં આવ્યા છે. તેઓની પાસે પણ વિવિધ ખેતી અંગે માહિતી મેળવવાંમાં આવે છે. અમેરિકા જાય ત્યારે મેનેજરને જરૃરિયાત મુજબ ટેલિફોનિક વાતચીત કરીને પાકની સ્થિતિ જોવા માટે ટેકનોલોજીના માધ્યમથી ફોટોગ્રાફ્સ અને વિડીયો પણ મંગાવી લેે છે. આ સિવાય કૃષિ નિષ્ણાત પણ ફાર્મની મુલાકાત લે છે અને તેઓ રોગ-જીવાત સહિત ખાતર અને પાણીની પણ માહિતી આપે છે. તેઓની સાથે પણ જરૃરિયાત મુજબ ટેલિફોનિક વાતચીત કરીને ગુજરાતની ખેતી અંગે માહિતી મેળવે છે.

આંબામાં ઈઝરાયલી સીસ્ટમથી પ્રુનિંગ

એનઆરઆઈ ખેડૂત આંબાની ખેતીમાં નિષ્ણાતોની સલાહ લઈને ઈઝરાયલીંગ સિસ્ટમથી પ્રુનિંગ કરાવે છે. સાથે જ ઉત્પાદન પણ રોગ જીવાતોને કંટ્રોલમાં રાખીને લેવામાં આવે છે. આંબા પર પ્રુનિંગ પરફેક્ટ ટ્રેઈન કરેલા માણસો પાસેથી કરાવવામાં આવે છે. જેને કારણે આંબા સાત ફૂટ સુધીની જ હાઈટમાં રહે છે. તેના ફાયદા પણ ઘણા છે. નિકાસ માટે કેરીની ક્વોલિટી મળી શકે છે. હાર્વેસ્ટીંગ કરવા માટે મજૂરોની પણ જરૃરિયાત ઓછી રહે છે. કાળજી સારી રખાય એટલા માટે ભાવ પણ સારા મેળવી શકાય છે અને ઉતારામાં પણ આસાની રહે છે.

આંબાના ૬ થી ૭ હજાર ઝાડ

ખાસ કરીને શેરડીની ૩૦ વીઘામાં ખેતી છે. તેમાં ૧ વીઘામાંથી ૨૫ ટન ઉત્પાદન મેળવવામાં આવે છે એટલે કુલ ૩૦ વીઘામાં ૭૫૦ ટન ઉત્પાદન રહે છે. આ સિવાય ૧૫ વીઘામાં ડાંગરમાંથી વીઘે ૧૨થી ૧૩ મણ ડાંગરનું ઉત્પાદન રહેતાં કુલ ૧૮૦ મણ ઉતારો મળે છે. આ સિવાય આંબાના ૬થી ૭ હજાર ઝાડ છે જે  ત્રણથી ચાર વર્ષના થઈ ગયા છે. તેના પરથી પણ સિઝન દરમિયાન ઉત્પાદન લેવામાં આવે છે. આમ વર્ષોથી અમેરિકા સ્થાયી થયેલા અને મૂળ બારડોલી તાલુકાના આફવા ગામના દિલીપભાઈએ આખી દુનિયામાં વિવિધ વ્યવસાય અને હોદ્દા સંભાળીને દેશ અને વતનનું નામ રોશન કર્યું છે. સાથેજ ખેતીમાં પણ ઝંપલાવીને એક સફળ ખેડૂત હોવાનો ગર્વ પણ અનુભવ્યો છે. આંબાની ખેતીમાં આ ખેડૂત સફળ છે. બારડોલીના આફવામાં ૧૪૦ વીઘામાં પથરાયેલી જમીનમાં તેઓ શેરડી, ડાંગરની પણ ખેતી કરે છે. દક્ષિણ ગુજરાતમાં થતી શેરડીની ખેતી  ખેડૂતે જાળવી રાખી છે.


published in Gujarat leading agriculture news paper Agro sandesh..